Ayiti se bèl lanmè, se bèl montay ak bèl rivyè.
Se bèl plaj ak pye kokoye, bèl peyizaj ak bèl koulè.
Ayiti se sant kafe k'ap monte nan nen m le maten.
Se sant lawouze ki fèk poze pou flè dizè ka boujonnen.
Ayiti se Basen Ble, Kaskad Pichon avèk Sodo.
Se Akaden, La Sitadèl, se Labadi ak Marigo.
Ayiti se Lavale, se Pòsali ak Zabriko.
Se Mòn Lasèl, Pik Makaya, se Mamlad ak Mòn Pilbowo.


Ayiti se yon dous makòs, se yon ponyen pistach griye.
S'on ji kole ki pou ban m fòs, s'on boutèy kola ki byen glase.
Ayiti s'on bon griyo, s'on bon fritay, 'on bon taso.
S'on bon legim avèk sirik, s'on bon diri avek lalo.


Ayiti s'on bon bouyon, s'on soup joumou a tout piman.
S'on bon kasav avèk manba ke ou tranpe nan akasan.
Ayiti s'on bon donmbwèy k'ap marinen n'on bon sòs pwa.
S'on bwakochon, 'on bon kleren,
Ayiti s'on bon kafe diswa.


Ayiti cheri, pou jan mwen renmen w!
Mwen vin depoze ti kè mwen nan men w.
Ayiti cheri, pou jan m adore w!
Pa gen anyen k'ap janm fè mwen kite w.


(REFREN)
Ayiti cheri, pou jan mwen renmen w!
Mwen vin depoze ti kè mwen nan men w.
Ayiti cheri, pou jan m adore w!
Pa gen anyen k'ap janm fè mwen kite w.


Ayiti s'on bèl mizik, s'on bann a pye, s'on twoubadou.
S'on son kata seremoni, 'on son kwachi, yon son tanbou.
Ayiti se tè Ogou, se tè zansèt kite pou nou.


Se la lesklavaj t'aboli, s'on tè libète ak vodou.
Ayiti se festival, se tisourit, se fèt chanpèt.
S'animasyon nan Kanaval, se yon ti zile k' pa janm frèt.
Ayiti s'on bon bezig, s'on domino, s'on bon twasèt.
S'on reveyon kote ki gen bouyon,
se la k' gen kenbe tèt.


Ayiti se yon konbit, peyizan k'ap sèkle latè.
Se ti machann yo k'ap desann, pou y'al goumen ak lavi chè.
Ayiti se timoun yo k'ap reve de yon bèl avni.
Se dlo rigòl la k'ap desann, ki pa konn kote l pral ateri.


Ayiti se anba tant lan depi apre 12 janvye (2010).
Se labou k' lev' on move sant chak lè 'on ti lapli fin tonbe.
Ayiti se sou beton'an pou konn "la vraie" reyalite.
Se youn ki tris, men grasa Dye, se pa li sèlman n' ka chante.


(REFREN)
Ayiti cheri, pou jan mwen renmen w!
Mwen vin depoze ti kè mwen nan men w.
Ayiti cheri, pou jan m adore w!
Pa gen anyen k'ap janm fè mwen kite w.


Ayiti cheri, pou jan mwen renmen w!
Mwen vin depoze ti kè mwen nan men w.
Ayiti cheri, pou jan m adore w!
Pa gen anyen k'ap janm fè mwen kite w.


Ayiti se yon manman ki konn sa yo rele doulè.
Yon fanm ki djanm, yon fanm vanyan, menm si l konnen li pa pafè.
Ayiti se yon bèl fanm ki menm si l pase anpil mizè.
Li toujou f'on jan l ranje kò l pou tout pitit li toujou fyè.
Ayiti se tout bagay sa a yo ki fè ke nou renmen w.
E menm si wout la long, konnen n ap toujou la pou n' kenbe men w.
Ayiti cheri w mèt kwè m
Pa gen anyen k ap fè m kite w
M ap toujou la pou ou cheri,
Kite mizik sa a dòlote w.
M pap janm kite w.

(1ye Jen 2012)