Kiyès ou ye?

Lè je m tonbe sou lonbray ou
Se menmjan van retire pay
Gade w kap pase eksite loray
Vit bese tèt kouri chèche sizay

Si map manje ou fenk parèt , map trangle
Si w touche m vle pa vle m pa ka pa tranble
Tout kòm likid m dyare menm nan ble
Lage m nan fon lanmè m retounen tou ble

Malgre m malad souvan nan janm
Devan w nanpwen gason ki gen ganm
M mèt ranje kòm pran tout sanm
Wa di m pran lapoula nan piman ak jenjanm

Pale w tèlman siwo li degoudi zòrèy
Je m vire lanvè m resi pèdi yon fèy
Tout kòm ap ret tann ou nan yon bèl akèy
Jouk ou pran m nèt pou yo rele m move pèy

Lè w souri banm lajwa pran m , m fè gwo rèl
Toupatou chèche fouyapòt ak makorèl
Je yo sòti , siflèt ak banbou tonbe pou ou ki bèl
Tripotay gaye , polemik yo kouri met kèl

Pou w ka wè m fè tout , pase kòd nan kou pou m pann
Kouri al nan kizin bwote nan figi m sann
Pa fòs m kouri manje kann
Si w pa okipe m ak fawouch m vann.