Temwayaj lanmou m

Byen souvan nan je klè mwen t ap chèche yon lanmou ki pafè.
Yon lanmou ki sensè, yon lanmou ki sot nan kè.
Yon lanmou ki pa 'care' si nan vi m sounami fè djèdjè.
Men ki pote bonè kou larivyè nan mitan kè yon forè.
An pasan, sa fè m konprann pou ki rezon, dezespereman, Adan t ap chèche Èv.
E sa fè m konprann pwofondè kè kontan l e poukisa l te resevwa l ak souri o lèv.
Wi, se pa yon rèv.
Lanmou reyèl, lanmou pa m nan se yon prèv.

Brèf,
Jodi a m pa la pou m rakonte yon bann pwezi.
Ni fè yon pakèt powèm ak literati.
M jis pral eksprime sa mwen santi.
Paske se t ap yon peche si m pa pran plezi nan dekri sa k fè m souri...
Nan jou sa yo k ap depafini.

Anhan! li vòlè sans mwen,
Li se esans mwen, dènye kout chans mwen,
li nan kadans mwen.
Pou li m pap pè f'on dans soti Grandans rive Bèlans.
Non, lanmou sa a pa rans.

Li fè m awoyo,
depi jou n kontre sou rezo yo
rive jodi a devan je yo.
Nou pa t janm pè janbe dlo.
E chak pwoblèm ki vin pou 'blow' n,
Tankou daypè, n ap chanje yo.

Lanmou vise kè m avèk bon pens.
Pandan lahèn te vize m mal, te vize m sal kou Pòtoprens.
Li fè m twouve nan ou yon prens.
Sa fè entansite atachman m pou ou pa mens.
E m prè pou m ba w sa m pa genyen...

Èske w konn sa w reprezante pou mwen cheri?
Fèmen je w, kite m di w yon lòt fwa sa w ye...

Ou se lakansyèl ki travèse syèl kè m.
Ou se chalè ki rechofe tout chè m.
Ou se doktè ki la pou geri plè m.
Dous makòs nan bon moman, ki pral pase swaf vrè bonè m.
Sèl ou ki gen dwa konn soupi kè m.

Ou se rezon ki fè m vle vin pi bèl chak jou pi plis.
Kite m di w:
Ou se reyon ki fè jodi samdi...
M wè madi anvan lendi.
Nan foli m ap degaje sèjousi, ou konplis.
E nan ou m vle pran tout plezi m; paske pou ou, m santi m &pos;crazy&pos;.

Oh, Jewova! M pa ka konte konbyen fwa m li nan lwa w.
M pa sonje konbyen fwa m li istwa w,
pou m fè yon bon chwa.
M pa t janm bese lebra, m pa t janm kite sa.
Epi gad' jodi a jan m pot' laviktwa!
Wi, m jwenn li!
Wi, se premye fwa.
Wi, m di l awotvwa:
"Wi" devan zanmi m, "Wi" devan fanmi m.
"Wi devan lèzòm, "Wi" devan lesyèl.
M di: "Wi, mwen damou!
Wi, mwen pare.
Wi, li pap fasil, men, Wi! n ap reyisi."

Se nòmal pou gen moman difisil,
Men, pawòl ou, oh, Jewova, toujou itil.
E nan kèlkeswa sitiyasyon an, nou pap bouke li l.
Dayè,
Se la sekrè pou kè kontan nou an pran chè.
Epi bonjan egzanp nan lantouraj nou sèvi n angrè.
Byenke ap toujou gen pikan, ap toujou gen vipè, men li klè,
Nou pap pè paske Jewova se sèl Seyè n.

Tanpri papa, fè n favè,
Pou pyebwa lanmou nou pot bon fwi.
Tanpri papa, fè n favè,
Nou pap janm sispann fè kè w rejwi.
Wi, souple,
Nan kwi lanmou nou, lage bonè nan plas malè.
Wi, nan kwi lanmou nou,
Lage onè nan plas doulè.
Tanpri, nan kwi lanmou nou,
Ajoute respè nan plas ògèy.

E pou m fini, tankou yon kòd an 3, wi, nou trese.
Sou wout lavi a, ou ba li men m pou n avanse.
Nan sèvis ou n ap kenbe fèm e n ap vanse.
N ap viv lanmou n, n ap rete stab, san balanse.
Nan jou spesyal nou an...nou de.
Nou deside pran onètete, senserite, fidelite nou blennde.
Pou n kontinye kase chenn dezinyon, dout ak jalouzi an de.

Paske kote lawouze lanmou ap fleri, se la yo pral tande n.
E mwen avè w siyen kontra sa a pou toutan jiskaske lanmò separe n.